سائیکل کے پہیے جہاں جواب دے گئے، وہاں ثمر خان نے اسے کندھوں پر اٹھا کر سفر جاری رکھا، 4 ہزار 500 میٹر کی بلندی پر بیافو گلیشیئر سائیکلنگ کرکے تاریخ رقم کردی۔
پاکستان کی باہمت مہم جو ثمر خان نے عزم، حوصلے اور غیرمعمولی جدوجہد کی ایسی مثال قائم کی جس نے دنیا بھر میں پاکستان کا نام روشن کیا۔ خیبر پختونخوا کے علاقے دیر سے تعلق رکھنے والی ثمر خان نے 2016ء میں تقریباً ساڑھے چار ہزار میٹر کی بلندی پر واقع بیافو گلیشیئر پر سائیکل چلا کر ایک منفرد اعزاز اپنے نام کیا۔ اس مہم کی خاص بات یہ تھی کہ جہاں برفانی راستوں پر سائیکل چلانا ممکن نہیں تھا، وہاں انہوں نے سائیکل کو کھول کر اس کے حصے اپنے سامان کے ساتھ اٹھائے اور کئی روز کی دشوار گزار پیدل مسافت طے کی۔
ثمر خان کی کامیابی کے پیچھے برسوں کی محنت، مشکلات کا سامنا کرنے کا حوصلہ اور روایتی سوچ سے آگے بڑھنے کا جذبہ شامل ہے۔ انہوں نے راولپنڈی میں پرورش پائی اور طبیعیات میں ماسٹرز کی ڈگری حاصل کی، تاہم یونیورسٹی کے زمانے میں پیراگلائیڈنگ کی تربیت نے انہیں مہماتی کھیلوں کی دنیا سے متعارف کرایا۔ فضا میں اڑنے کے تجربے نے ان میں اپنی صلاحیتیں آزمانے اور نئے چیلنجز قبول کرنے کا جذبہ پیدا کیا۔
بعدازاں سائیکلنگ ان کی زندگی کا اہم حصہ بن گئی۔ ابتدائی دنوں میں مناسب پیشہ ورانہ سامان اور وسائل کی کمی کے باوجود انہوں نے سفر کا آغاز کیا۔ ایک مرتبہ روایتی لباس، اسکارف اور سینڈل پہن کر ایبٹ آباد کی جانب سائیکل پر نکل پڑیں، تاہم بارش اور راستے کی مشکلات نے انہیں احساس دلایا کہ طویل سفر کے لیے شوق کے ساتھ مناسب تیاری، تربیت اور حفاظتی سامان بھی ضروری ہے۔
ان کے اس شوق کو ابتدا میں گھریلو سطح پر بھی تحفظات کا سامنا رہا۔ والدہ چاہتی تھیں کہ ثمر کوئی محفوظ اور روایتی پیشہ اختیار کریں، جبکہ پاکستان میں خواتین کے لیے طویل فاصلے تک سائیکلنگ کرنا بھی عام بات نہیں تھی۔ سڑکوں پر ٹریفک، لوگوں کے تبصرے اور سماجی رویے ان کے لیے اضافی مشکلات کا باعث بنتے رہے، لیکن انہوں نے ہمت نہیں ہاری۔
ثمر خان نے ساتھی سائیکلسٹ گل افشاں طارق کے ہمراہ اسلام آباد سے خنجراب تک سائیکلنگ کا سفر بھی کیا۔ قراقرم ہائی وے پر طویل مسافت طے کرنے سے ان کے اعتماد اور تجربے میں اضافہ ہوا۔ اس دوران انہیں مقامی لوگوں کی جانب سے بھی بھرپور تعاون ملا۔ کہیں پانی اور پھل پیش کیے گئے تو کہیں سائیکل کی خراب چین درست کرنے میں مدد فراہم کی گئی۔
ان کی زندگی کا ایک بڑا سنگ میل بیافو گلیشیئر پر سائیکلنگ کا منفرد منصوبہ تھا۔ اس مہم کے لیے انہوں نے طویل تحقیق کی، تجربہ کار کوہ پیماؤں سے مشاورت کی اور مقامی رہنماؤں کی مدد حاصل کی، کیونکہ گلیشیئر تک سائیکل پہنچانا اور وہاں اسے چلانے کے قابل بنانا ایک غیرمعمولی چیلنج تھا۔
24 جولائی 2016ء کو اسلام آباد سے شروع ہونے والا یہ سفر ایبٹ آباد، ناران، کاغان اور بابوسر سے ہوتا ہوا شگر اور اسکولی تک پہنچا۔ اس کے بعد دشوار گزار پہاڑی راستوں اور برفانی علاقوں میں سائیکل چلانا ممکن نہ رہا، چنانچہ ثمر خان اور ان کے ساتھیوں نے سائیکل کو مختلف حصوں میں کھولا اور اسے دیگر ضروری سامان کے ساتھ اٹھا کر پیدل سفر جاری رکھا۔
شدید سردی، پتھریلے راستوں اور دشوار گزار گلیشیئر پر کئی مراحل طے کرنے کے بعد بالآخر وہ ایسی برفانی سطح تک پہنچ گئیں جہاں سائیکل کے پہیے دوبارہ جوڑے جا سکتے تھے۔ سائیکل کو دوبارہ تیار کرنے کے بعد ثمر خان نے تقریباً ساڑھے چار ہزار میٹر کی بلندی پر بیافو گلیشیئر پر سائیکلنگ کرکے تاریخ رقم کردی۔ انہیں اس گلیشیئر پر سائیکل چلانے والی پہلی خاتون کے طور پر پہچان ملی۔
اس کامیابی نے نہ صرف ان کی عالمی سطح پر شناخت بنائی بلکہ ان کے خاندان کا اعتماد بھی بڑھایا۔ ابتدا میں ان کے شوق کے حوالے سے فکرمند رہنے والی والدہ بھی ان کی کامیابیوں پر فخر محسوس کرنے لگیں۔
ثمر خان نے اپنی کامیابیوں کا سلسلہ یہیں نہیں روکا۔ دسمبر 2017ء میں وہ تنزانیہ کے مشہور کوہِ کلیمنجارو پر سائیکلنگ مہم کے لیے روانہ ہوئیں۔ جنگلات، دشوار گزار پہاڑی راستوں اور انتہائی بلندی پر واقع سرد علاقوں سے گزرتے ہوئے انہوں نے یہ مہم بھی کامیابی سے مکمل کی اور کلیمنجارو کی چوٹی تک سائیکل کے ساتھ پہنچنے والی پہلی پاکستانی خاتون بن گئیں۔
مہماتی کھیلوں میں اپنی کامیابیوں کے بعد ثمر خان نے ثمر کیمپ کے ذریعے خواتین اور نوجوانوں کو بھی ایڈونچر اسپورٹس کی جانب راغب کرنے کا سلسلہ شروع کیا تاکہ پاکستان میں زیادہ سے زیادہ افراد کو اپنی صلاحیتیں آزمانے اور روایتی حدود سے آگے بڑھنے کے مواقع مل سکیں۔
ثمر خان کی داستان محض سائیکلنگ کے چند ریکارڈز یا برفانی پہاڑوں پر کامیابی کی کہانی نہیں بلکہ یہ عزم، خود اعتمادی اور مسلسل جدوجہد کی علامت ہے۔ انہوں نے ثابت کیا کہ کامیابی کے سفر میں بعض اوقات منزل تک پہنچنے کے لیے اپنی سواری بھی کندھوں پر اٹھانا پڑتی ہے، لیکن اگر حوصلہ بلند ہو تو دشوار ترین راستے بھی منزل تک پہنچنے سے نہیں روک سکتے۔