شنہوا نیوز ایجنسی، چین کی خصوصی دعوت پر منعقد ہونے والی ساتویں ورلڈ میڈیا سمٹ میں پاکستان کی نمائندگی کرنے والی محترمہ رئیسہ عادل (پی آئی او)، ایگزیکٹو ڈائریکٹر جنرل پریس انفارمیشن ڈیپارٹمنٹ کا کردار محض ایک سرکاری نمائندے کی شرکت تک محدود نہیں رہا، بلکہ انہوں نے اپنی شخصیت، پیشہ ورانہ بصیرت، خوش اخلاقی اور قائدانہ صلاحیتوں سے پاکستان کے مثبت تشخص کو نہایت خوبصورتی کے ساتھ اجاگر کیا۔
بیجنگ میں منعقد ہونے والی اس عالمی میڈیا کانفرنس میں 112 ممالک کے ممتاز میڈیا ہاؤسز سے تعلق رکھنے والے تقریباً 500 میڈیا نمائندگان نے شرکت کی۔ یہ عالمی سطح کا ایک اہم اجتماع تھا، جہاں صحافت، ذرائع ابلاغ کے مستقبل، مصنوعی ذہانت کے بڑھتے ہوئے کردار اور عالمی سطح پر میڈیا کے باہمی تعاون جیسے اہم موضوعات زیرِ بحث آئے۔
اس عالمی اجتماع کے دوران محترمہ رئیسہ عادل اور پاکستان سے شریک میڈیا نمائندگان کو چین کے مختلف اہم اداروں کے مطالعاتی دورے کروائے گئے، جن میں شنہوا نیوز ایجنسی کے مرکزی ہیڈکوارٹر کا دورہ بھی شامل تھا۔ اس موقع پر پاکستان سے تعلق رکھنے والے میڈیا نمائندگان میں جناب سہیل بھٹی، عثمان شامی، زینب گیلانی اور ذکی ڈوگر بھی شامل تھے۔
ان تمام سرگرمیوں کے دوران محترمہ رئیسہ عادل نے جس وقار، متانت، معاملہ فہمی اور خوش اسلوبی کا مظاہرہ کیا، وہ یقیناً قابلِ تحسین ہے۔ انہوں نے پاکستان اور چین کے دیرینہ، گہرے اور آزمودہ تعلقات کی اہمیت کو ہر موقع پر مقدم رکھا اور اپنی گفتگو، طرزِ عمل اور باوقار موجودگی سے دونوں ممالک کے درمیان دوستی، اعتماد اور میڈیا تعاون کے رشتوں کو مزید مضبوط بنانے کا مثبت پیغام دیا۔
ان کی ایک نمایاں خوبی یہ بھی رہی کہ انہوں نے اپنے ہم وطن میڈیا نمائندگان کو محض ایک وفد کا حصہ نہیں سمجھا بلکہ ان کی بھرپور سرپرستی، رہنمائی اور حوصلہ افزائی کی۔ ان کے ساتھ قدم سے قدم ملا کر چلنا، ہر مرحلے پر رہنمائی فراہم کرنا اور ایک شفیق و ذمہ دار سربراہ کی حیثیت سے سب کو ساتھ لے کر آگے بڑھنا ان کی شخصیت کے ان پہلوؤں کو نمایاں کرتا ہے جو کسی بھی ادارہ جاتی قیادت کا حقیقی حسن ہوتے ہیں۔
بلاشبہ کسی عالمی فورم پر ملک کی نمائندگی کرنا ایک ذمہ داری ہے، لیکن اپنی شخصیت، کردار، اخلاق اور طرزِ عمل سے ملک کے لیے احترام اور خیرسگالی کے جذبات پیدا کرنا ایک اعلیٰ صلاحیت ہے۔ محترمہ رئیسہ عادل نے اس عالمی اجتماع میں اسی صلاحیت کا خوبصورت مظاہرہ کیا۔
کچھ شخصیات اپنے عہدے سے پہچانی جاتی ہیں، مگر کچھ اپنے کردار، خلوص، رویے اور دوسروں کے لیے آسانیاں پیدا کرنے کی صلاحیت سے دلوں میں جگہ بناتی ہیں۔
محترمہ رئیسہ عادل کی ساتویں ورلڈ میڈیا سمٹ کے دوران موجودگی اور ان کا دوستانہ، مشفقانہ اور قائدانہ کردار یقیناً ہمارے لیے ایک خوشگوار یاد اور قابلِ قدر تجربہ رہے گا۔ ان کی خدمات، تعاون اور محبت کا یہ تاثر وقت گزرنے کے ساتھ بھی ہماری یادوں میں تازہ رہے گا۔
ان کے لیے دل سے نیک تمنائیں اور اس امید کے ساتھ کہ وہ مستقبل میں بھی پاکستان کے مثبت تشخص، عالمی میڈیا روابط اور پاک چین دوستی کے فروغ میں اسی جذبے، وقار اور بصیرت کے ساتھ اپنا کردار ادا کرتی رہیں گی۔