اسلام آباد: معروف کامیڈین اور اسٹیج اداکار افتخار ٹھاکر نے اسٹیج فنکاروں کو تھیٹر چھوڑنے اور اللہ تعالیٰ اور رسول اکرم ﷺ سے اپنا تعلق مضبوط کرنے کا مشورہ دیا ہے، جس کے بعد ان کے بیان پر سوشل میڈیا پر بحث شروع ہوگئی۔
آصف اقبال کے انتقال پر اظہارِ افسوس کرتے ہوئے افتخار ٹھاکر نے کہا کہ وہ ایسے نظام سے مایوس ہیں جو ان کے بقول وعدہ خلافی، دھوکے اور بے ایمانی پر قائم ہے۔ انہوں نے اسٹیج پر پیش کیے جانے والے بعض مواد پر بھی تحفظات کا اظہار کرتے ہوئے کہا کہ بعض گفتگو ایسی ہوتی ہے جسے وہ اسلامی تعلیمات کے منافی سمجھتے ہیں۔
افتخار ٹھاکر نے اسٹیج فنکاروں کو مشورہ دیا کہ وہ تھیٹر کی دنیا چھوڑنے اور اپنی دینی زندگی بہتر بنانے پر توجہ دیں۔ انہوں نے کہا کہ فنکاروں کو اللہ تعالیٰ اور رسول اکرم ﷺ سے اپنا تعلق مضبوط کرنا چاہیے۔
معروف مذہبی اسکالر ڈاکٹر اسرار احمد کا حوالہ دیتے ہوئے افتخار ٹھاکر نے کہا کہ وہ بھی ماضی میں اس حوالے سے گفتگو کرچکے ہیں۔ ان کے بیان کے بعد سوشل میڈیا صارفین کی جانب سے اسٹیج ڈراموں کے مواد، فنکاروں کی ذمہ داری اور مذہبی اقدار سے متعلق مختلف آرا کا اظہار کیا جا رہا ہے۔